វ៉ាស៊ីនតោន៖ សហរដ្ឋអាមេរិកនឹងផ្តល់ប្រាក់ចំនួន ៥០០លានដុល្លារបន្ថែមទៀតដល់ប្រទេសអ៊ុយក្រែន ដើម្បីជួយដល់រដ្ឋាភិបាលប្រទេសនេះបន្តប្រតិបត្តិការរដ្ឋាភិបាលសំខាន់ៗ នេះតាមរដ្ឋមន្ត្រីក្រសួងរតនាគារសហរដ្ឋអាមេរិកលោកស្រី Janet Yellen ។

លោកស្រី Yellen បានប្រាប់សន្និសីទសារព័ត៌មានថា លោកស្រីបានចែករំលែកផែនការជំនួយក្នុងអំឡុងពេលកិច្ចប្រជុំជាមួយនាយករដ្ឋមន្ត្រីអ៊ុយក្រែន លោក Denys Shmyhal កាលពីថ្ងៃព្រហស្បតិ៍។

លោកស្រីថា៖ «តម្រូវការរបស់អ៊ុយក្រែនគឺជារឿងបន្ទាន់ ហើយយើងគ្រោងនឹងដាក់ជំនួយផ្ទាល់នេះទៅកាន់អ៊ុយក្រែនឱ្យបានឆាប់តាមដែលអាចធ្វើទៅបាន។ […] យើងដឹងថានេះគ្រាន់តែជាការចាប់ផ្តើមនៃអ្វីដែលអ៊ុយក្រែននឹងត្រូវការកសាងឡើងវិញ ហើយខ្ញុំប្តេជ្ញាធ្វើការជាមួយសភា និងសម្ព័ន្ធមិត្ត និងដៃគូអន្តរជាតិរបស់យើង ដើម្បីកសាងការគាំទ្រនេះក្នុងរយៈពេលមធ្យមនិងវែង»។

ជំនួយថ្មីនេះ នឹងជួយអ៊ុយក្រែន ផ្តល់ប្រាក់បៀវត្សរ៍ ប្រាក់សោធននិវត្តន៍ និងមូលនិធិកម្មវិធីសង្គមចាំបាច់ ដើម្បីបញ្ចៀសវិបត្តិមនុស្សធម៌ ដែលកាន់តែអាក្រក់ឡើង ដែលបណ្តាលមកពីការឈ្លានពានរបស់រុស្ស៊ី៕